Edukira joan
EU ES

Odoo (ERP) ikasgelan erabiltzen

ERP ingelesezko Enterprise Resource Planning akronimotik dator eta enpresa baten esparru nagusiak batzeko eta kudeatzeko baliabidea da. Odoo merkatuan dauden ERPtako bat da, kode irekiko software integratu bat da, enpresa eta erakunde txikien kudeaketarako erabili ohi dena.

Gure ibilbidea orain 5 urte hasi zen. Lan merkatuan antzeman genuen behar bati erantzuna eman nahian hasi ginen ERPa ikasgelan txertatzen. 2016-2017 ikasturtean DUAL kontratupean zeuden bi ikaslerekin ERPen inguruko informazioa biltzen hasi ginen, lanean ari ziren enpresetan ezarpen fasea aurrera eraman beharra baitzuten. Odoo aukeratu genuen eta 2017-2018 ikasturtean ikasgelan ezarri genuen lehenengo aldiz.

Eta zergatik Odoo?

1. Tolosalde eskualdean dugun enpresa motagatik (enpresen %75 enpresa txikiak dira, 10 langiletik beherakoak).

2. Ikastetxearen filosofiari eutsiz kode irekiko softwarea delako.

3. Ekonomikoki ikastetxean erabiltzeko esfortzurik txikiena eskatzen zuena zelako.

Iazko ikasturtera arte kanpoko enpresa baten laguntza izan genuen ikasturtero Odoo instalatu eta kudeatzen laguntzeko. Aurtengo ikasturtean ausartu gara ikastetxeko zerbitzarian instalatzen eta gure beharretara doituta jartzen. Kanpoko laguntzarik gabe kudeatzen ari gara. Enpresa batean ohikoak diren eragiketak kudeatzeko erabiltzen dugu, hots, erosketak, salmentak, inbentarioa eta kontabilitatea.

Ekonomia zirkularrari buruzko azoka

Birziklapena eta ekonomia zirkularraren inguruko sentsibilizazio kanpainaren barruan, azaroaren 27an, azoka bat antolatu zuen Tolosako Udalak. Eguraldia gaztainak erretzeko aproposagoa bazen ere, garagardoaz aritu ziren Mantentze alorrekoak. Ogi zaharra garagardoaren produkzioan nola txertatu azaldu zieten Triangulora bertaratutakoei. Ez da ohiko osagaia edari honen prestaketarako, baina oinarria zereala izanda ondo ezkontzen da garagar eta lupuluarekin, zapore atsegina emanez produktuari. Beraz, ogi hori hondakin bihurtu beharrean, berrerabilia izaten da; urrats txiki bat “0 zabor” helburua lortzeko.

Linealetik zirkularrera trantsizioa

Tolosaldea Garatzenek sustatua eta Bilibin aholkularitza etxearen laguntzaz, Ekonomia zirkularraren inguruko diagnosi bat eta bidaia orri bat diseinatu dira, eskualdeko zenbait enpresatan. Tolosaldea LHII-k ere parte hartu du proiektuan Mantentze Alorraren eskutik, Xabier Landa Mekanika Alorreko irakaslearen lankidetza izanik.

Negozio zirkular eredua, balio-katea, ekonomia zirkularrerako aukerak eta ikastetxeko hautua landu dira, hiru saiotan. Gure indarraldia hezkuntza izaki, bide hau lantzeko pausuak eman dira. Ikasgelan ekonomia zirkularra eta elementuen bizi zikloa modu sistematikoan landu ahal izateko, gaia ezagutzea beharrezkoa dela ulertu da. Hori lantzeko formakuntza bat egingo da azaroan zehar. Horrela, apurka-apurka, gure erronketan gai hau txertatzeko estrategiak hartuko ditugu.

2021eko Lanbide Heziketako Nazioarteko Kongresua

Hezkuntza Sailak antolatutako Lanbide Heziketako Nazioarteko Kongresuan hartu dugu parte, bai kongresuan bertan entzule gisa eta baita ere herrialde ugaritako partehartzaileen bisita ikastetxean jasoz. Eskola bisitatu zutenen artean, irakasleak, zuzendariak, gobernu-erakundeak eta beste hainbat eragile ere aurkitu genituen.

Oso bisita aberasgarria izan zen bai guretzat eta, esan digutenez, baita gurera etorri zirenentzat ere. Elkarlanerako sareak indartzeko aukera zoragarria izan da.

Ikastetxearen partaidetza arrakastatsua EuskoSkills 2021ean

Eskolako ikasleek urrezko bi domina eta zilarrezko beste bi lortu dituzte

Ikastetxeak espezialitate ezberdinetako sei ikaslerekin hartu du parte EuskoSkills txapelketan.

EuskoSkills, Hezkuntza Saileko Lanbide Heziketako Sailburuordetzak antolatua, Lanbide Heziketako zikloetan matrikulatuta dauden eta egiten duten zikloarekin zerikusia duten probetan parte hartzen duten ikasleei zuzendutako lehiaketa da. Lehiakideek egiten duten heziketa-zikloaren berezko trebetasunak erakutsi behar dituzte egun eta erdiko txapelketan zehar.

Ekimen honen helburu nagusia, txapelketen bidez, gaitasunek eta gaitasun-maila altuek arrakasta profesionala lortzeko eta errealizazio pertsonalerako dakarten funtsezko ekarpenaz kontzientziatzea da.

EuskoSkills 2021, 19 kategoriatan garatzen da, eta Euskadiko Lanbide Heziketako 41 ikastetxetako 146 ikaslek parte hartu dute aurten Irungo FICOBAn ospatu den lehiaketan. Kategoria bakoitzeko irabazlea Euskadiren ordezkari izango da datorren martxoan Madrilen ospatuko diren SpainSkills estatuko txapelketan.

Tolosaldeko ikasleen parte-hartzea

Oier Igoak eta Adrian Arellanok, Sareko informatika sistemen administrazioko zikloko ikasleek, heziketa-zikloaren izen bereko kategorian hartu zuten parte, eta raspberry Pi eta Cisco packet tracer erronkak landu zituzten. Egun eta erdiko lan gogorraren ondoren, Adrian Arellanok urrezko domina irabazi zuen.

Igor Garmendiak, Soldadura eta galdaragintza zikloko ikasleak, soldadura kategorian parte hartu zuen, egun eta erdian zehar hiru proba ezberdin eginez. Igorrek lan bikaina egin zuen, urrezko domina irabaziz.

Oinatz Otegik eta Markel Muñozek, Produkzioaren programazioko zikloko ikasleek, zenbaki kontroleko fresadora atalean hartu zuten parte, pieza baten planotik abiatuta fabrikatzeko programa eginez eta zenbaki kontroleko fresatzeko makinaz fabrikatuz. Bi ikasleek lan bikaina egin zuten, eta Markel Muñozek zilarrezko domina lortu zuen.

Asier Sarasolak, Instalazio elektriko eta automatikoak zikloko ikasleak, instalazio elektrikoen atalean hartu zuen parte, etxeko zirkuitu elektriko baten instalazioa eginez. Asierrek zilarrezko domina irabazi zuen egindako lan bikainari esker.

Eskertza ekitaldia

Ikastetxeak EuskoSkills 2021ean parte hartu duten ikasle eta irakasleei eskerrak emateaz gain, zoriondu egin nahi izan ditu, horretarako prestatutako ekitaldian.

ikaslan

elebasque

fp
ikaslan

elebasque

fp
© tolosaldea
Telefonoa: 943651147
idazkaritza@tolosaldealh.eus